Acceso usuarios
Xosé Manuel Sánchez Rei 
Juan Antonio Saco Arce é coñecido por ser o autor da primeira gramática galega feita con rigor e por se dedicar á compilación de literatura tradicional, aínda que tamén cultivase a poesía e escribise pequenos ensaios sobre a lingua. Entre os contidos expostos na súa Gramática gallega de 1868 figura a primeira tentativa de clasificar os falares galegos, os cales, partindo dunha serie de trazos fonéticos e morfolóxicos, foron interpretados nunha dupla división entre unha variedade meridional e outra setentrional. Non se podendo acompasar esta perspectiva desde a actualidade, supuxo, no entanto, un fito na daquela incipiente lingüística galega que sería subscrito por varios investigadores e eruditos. No presente texto examinamos aquela proposta e a repercusión que tivo, ben como valorizamos outras informacións sobre a diversidade dialectal da altura tamén fornecidas polo propio Saco Arce.
