Acceso usuarios
Natxo Sorolla, Francesc Xavier Vila i Moreno 
Hizkuntzaren dimentsioez eta hainbat arazo tekniko azalduz hasten dute artikulua bi egile kataluniarrek. Erabileraren tipologiez, ikerketa makrosozial eta mikrosozialez, ikerketa kuantitabiboez eta kualitatiboez, datuen tipologiez, behatutako eta aitortutako datuez... azalpen argia eskaintzen digute, gaian sartzen hasteko. Jarraian, Katalunian dauden ikerketa tipologia ezberdinak aztertzen dira, eta hauen inguruan eztabaidatzen da: zentsuko datuak, ezagutzari eta erabilerari buruzko inkestak, aitortutako eta behatutako datuetako aldea, ... Soziolinguistika katalana gertutik ezagutzeko hainbat lanen aipamena ere egiten digute, horrekin batera: Torres (1988), Noves SL-n 2002ko neguan eta 2003ko udaberrian argitaraturiko lanak, Puigpelat (2004), Querol (2002, 2003), Fabá (2003) ... Amaitzeko, erabileran eragiten duten faktoreak dituzte mintzagai egileek, egindako ikerketen ondorioetan oinarrituta. Etorkizunera begira, berriz, hizkuntza erabileraren ikerketan dagoen interesa nabarmentzen digute; azken aldian, aitortutako datuen kalitateaz eta behatutako datuen azterketaren garapenaz kezka agertu izan da, nahiz eta hau aztertzeko proiektu solidorik ez garatu oraindik.
