Acceso usuarios
Clarinda de Azevedo Maia 
El trabayu entama faciendo delles consideraciones de calter teóricu sobro dos procesos de pergrán importancia na historia de les llingües, la estandarización y la ellaboración. Col envís de comprender la muncha complexidá del procesu d’estandarización y la diversidá d’aspeutos llingüísticos y sociales presentes nel so desendolcu, faise referencia a los destremaos entamos de sistematización del so estudiu a lo llargo de la historia más o menos recién de la Llingüística, dende la Escuela de Praga y la d’Einar Haugen hasta les reflexones de representantes de la Romanística alemana, Peter Kock y Wulf Oesterreicher. Na implementación histórica d’una variedá que se convertirá n’estándar la ellaboración surde como una de les fases/estadios d’esi procesu. Los citaos romanistes alemanes, al ocupase d’estos procesos, aplíquenlos a la trayeutoria temporal de les llingües, especialmente les romániques, y rellacionen el conceutu d’ellaboración cola so teoría de la llingua a distancia y de la proximidá comunicativa, y encuádrenlo nel ámbitu d’una conceición global de la oralidá y de la escrituralidá. Estremen, d’estamiente, ente dos aspeutos pervenceyaos ente ellos, la ellaboración estensiva y la ellaboración intensiva, carauterizándose’l primer aspeutu pel espardimientu de les primitives variedaes romániques a los nuevos ámbitos funcionales y pel algame de nueves tradiciones discursives de la distancia comunicativa; y el segundu pela ampliación de recursos testuales y llingüísticos. Al llume del cuadru conceptual ufiertáu, analícense esos procesos na historia de les llingües ibero-romances, más en particular les que medraron na órbita de la monarquía asturianolleonesa: l’asturianu, el gallegu, el castellanu y el portugués. Procédese, igualmente, a una comparanza histórica ente elles, teniendo en cuenta los citaos procesos, que les cincaron en graos muncho variables y que se desendolcaron en contestos históricos destremaos. Una referencia particular faise a Asturies onde, pola mor de la castellanización temprana del territoriu, fráyase ceo’l procesu d’ellaboración y desaníciase tamién la posibilidá de desendolcu del procesu de codificación nel mesmu contestu históricu nel que lo fixeren otres llingües ibero-romances.
