Acceso usuarios
Ramiro González Delgado 
Lo mesmo que les demás lliteratures hispániques, europees y universales, la lliteratura asturiana bebió nes fontes de los mitos de l’Antigüedá Clásica, dexándose ver la influyencia d’eses fontes yá dende los testos del primer autor en llingua asturiana conocíu hasta güei. De magar entós, la presencia de dioses y héroes griegos y romanos ye daqué que se constata davezu en bien d’autores de la lliteratura asturiana que, o bien-yos dan protagonismu nos sos testos a esos personaxes o bien, n’otres ocasiones, faen referencia a ellos per aciu de metáfores, comparances, alusiones, cites…, siendo dacuando un emplegu consciente per parte d’esos escritores y dacuando inconsciente, pol puxu de la tradición clásica nel bagaxe cultural asturianu. Y, nos autores contemporáneos, foi y ye perinteresante ver les recreaciones que se faen d’eses histories mitolóxiques dende una perspeutiva anovadora, adaptando’l mitu a nuevos contestos socio-histórico-culturales. El tema d’esa presencia clásica nos testos asturianos foi tratáu yá por dellos estudiosos, aplicándose siempre l’análisis a testos escritos del s. XVIII n’adelantre; pero, teniendo en cuenta’l gran puxu de la lliteratura de tradición oral que corrió ente la xente del país enantes d’esa dómina, lliteratura onde tamién podemos rastrexar mitos clásicos, como vamos ver darréu, paeció importante centrar agora l’análisis na presencia de la mitoloxía grecollatina nos anicios de la lliteratura asturiana en dos dómines distintes: d’una parte na «medieval» tradición oral, col romance de «Blancaflor y Filomena»; d’otra, nes fábules mitolóxiques del sieglu XVII que tienen por protagonistes a Hero y Lleandro, Dido y Enees y Píramo y Tisbe. Independientemente del so orixen y del tiempu nel que que foron creaes, decatámonos de la presencia d’una constante: en toes estes obres la mitoloxía clásica sirve como exemplu pal públicu y da conseyes na llingua popular a un auditoriu cuasimente illetráu.
