Acceso usuarios
El xéneru criminal convirtióse nes caberes décades nuna de les formes narratives de más éxitu nes distintes lliteratures d’España. La esmolición de la xente énte los camudamientos políticos y sociales, primero, y l’interés que llevanta la intriga d’esti tipu d’obres, más llueu, espliquen el bon momentu pel que vien pasando’l xéneru nestes décades. Esti fenómenu nun ye namái nacional, porque l’éxitu de la novela criminal paez producise na mayor parte de les lliteratures del mundu y con interrellaciones bien prestamoses, al facer vidable la traducción de munchos testos el puxu d’esta clas d’obres en destremaos países. Un casu paradigmáticu ye la triloxía «Millenium», del suecu Stieg Larsson, que llogró facer alicar l’interés pol xéneru en lliteratures onde escayere había yá tiempu.
Nesti trabayu vamos centranos na historia y el desendolcu de la novela criminal asturiana, xéneru que presenta los sos anicios nesta llingua nel añu 1984, col asoleyamientu de La muerte amiya de nueche, de Xuan Xosé Sánchez Vicente. De magar entós, apaecieron una ventena de noveles qu’aborden el xéneru de formes muncho distintes. Al traviés de la teoría de los polisistemes, analizaremos el xéneru criminal asturianu en rellación col restu de lliteratures d’España, lo que va permitinos solliñar los sos principales asemeyos y dixebres. D’esta miente, y venceyándola colos distintos sistemes lliterarios d’España, propondremos una periodización de la novela criminal asturiana pa pescanciar meyor les carauterístiques de les noveles de cada etapa y afondar nos elementos comunes que dexen agrupales.
A lo cabero, analizaremos tamién dalgunos fechos destacables del xéneru criminal asturianu y rellacionarémoslos cola situación nel restu de sistemes lliterarios, como la presencia de la muyer como autora y protagonista, la profundización de los escritores na novela criminal o l’éxitu de les sagues.
